بعيد الميلاد وأعياد الميلاد بَتهدي اولادك ألعاب بحبّوها، بس ما بتوقف هون! لأنّ أوّل ما تنزل لعبة جديدة عالسوق ويشوفوها مع أصحابن، رح يطلبوها... ومين بيعرف شو الجديد!

علّم اولادك قيمة المصاري على بكّير، كيف؟

. المصروف: خلّي اولادك يتحكّموا بمصروفن ليعرفوا قيمة المصاري. إذا خلّصوا درسن أو نجحوا بتزيد المصروف وبتنقصه عند أي تقصير.

. تجميع المصاري: بتقدر تعلّم الصغار يجمّعوا بـ "الإجّة" والكبار بتفتحلن حساب توفير بالبنك. شجّع اولادك يحتفظوا بقسم من مصروفن على جنب، وبس يشوفوا كيف مصريّاتن عم تزيد بيتحمّسوا أكتر.

. تحديد أهدافن: لازم يتعبوا ليحصلوا على غرضن؛ حتّى لو كان مجرّد لعبة أو حتّى video game بس أكيد ضمن المعقول. اطلب من اولادك يحددوا شو بدّن يشتروا لأن إذا عرفوا يحددوا الهدف رح يعملوا المستحيل لتحقيقه.

. تابعوا تقدّمن: وقت بكون عندن سبب للتجميع، فيك ترسملن خطّة ليتابعوا تقدّمن، وإذا ما قدروا يجمعوا المبلغ المطلوب، فسّرلن السبب وكيف معقول يجمعوا أكتر بالمرّة القادمة.

وقت بيعرفوا اولادك قيمة المصاري، رح يعملوا المستحيل ليحققوا أهدافن، ساعتها فيك تعلّمن طُرق مختلفة ليجمعوا ويشتروا شو ما بدّن!