أيلول عالبواب... وكلّنا منعرف شو يعني شهر أيلول. يعني أوراق الشجر اصفرّت، الدنيي سقّعت والمدارس للأسف قرّبت! بس هالسنة التحضير لرجعة المدارس ما رح يكون متل كل سنة. والسبب إنّو بنك بيروت مرافقك ببداية الموسم الدراسي ورح يقدّملك مجموعة نصايح لتخفيف مصاريفك.

1) بلّش التسوّق بالبيت
قبل ما تتوجّه عالسوق وتبلّش دفع المصاري، فيك تعمل جردة لخزانات البيت. رح تتفاجأ بكمّيّة الأقلام، المساطر، الدفاتر إلخ. اللي بعدها جديدة وفيهن يستعملوها ولادك بهالسنة الدراسيّة. يمكن تشوف كمان إنّو تياب السنة الماضية بعد ما صغرت أو إنّو مريول ابنك الكبير بيقدر يستعملوا خيّو هالسنة. تخايل كم شغلة كنت رح تشتريها وإنت أصلًا عندك متلها! بهالشكل، بتكون وفّرت على جيبتك ورتّبت البيت!

2) حضّر لائحة المشتريات
من بعد ما شفنا شو عنّا غراض وشو ناقصنا قرطاسيّة، لازم نقوم بخطوة تانية قبل ما نبلّش التسوّق. اكتب لائحة بالأمور اللي رح تشتريها، وما تنسَ تميّز بين شو بدّن ولادك وشو بيحتاجوا فعليًّا. ما في شكّ إنّو القرطاسيّة الجديدة بتحمّس الأولاد على الرجعة عالمدرسة، ومن الصعب حتّى علينا إنّو نقاوم شرائها. كرمال هيك، رح تساعدك هاللائحة بتجنّب الصرف العشوائي.

3) نقّي مشترياتك استراتيجيًّا
مين منّا ما بينطر فترة التخفيضات ليشتري تياب جداد؟ فيك تتّبع نفس الإستراتيجيّة لشراء غراض المدرسة. أكيد ولادك لازم يكون معهن بعض العناصر الضروريّة من أوّل يوم. بس من الممكن إنّو تكفّيلن الأمور الثانوية (البدل الثاني عن البنطلون الكحلي مثلًا!) بعد انتهاء موسم المدارس، انخفاض الأسعار وقبض معاش الشهر الجديد!
استراتيجيّة تقسيم مشترياتنا ما خلصت هون. متل ما بتقدر تأجّل شراء بعض الأمور، فيك تستبق شراء أمور أخرى. هالسنة كمان إبنك رح يضيّع محّايتو أكتر من مرّة وبنتك رح تحتاج أكتر من دفتر واحد لصفّ الرياضيّات. فاستفيد من عروضات الموسم واشتري محّايتين، دفترين... – أو أيّ غرض بيستعملوا ولادك بكترة خلال السنة الدراسيّة - ليطلعلك التالت مجّانًا. يعني فكّر من اليوم كيف تتحضّر لكلّ السنة بأقلّ تكلفة وضرر ممكن!

4) ركّز على النوعيّة، مش العلامة التجاريّة
مش غلط ننبّش على شنطة حلوة ومريحة لأولادنا. بس مين قال إنّو هيك شنطة ضروري تكون إلها علامة تجاريّة معيّنة؟ مننصحك بالتوجّه على المكتبات الصغيرة بدل المحلّات المعروفة بإسمها وأسعارها. يمكن تلاقي شنطة الأحلام حدّ البيت وبنصّ السعر... ولتكمل معك، بتكون شجّعت المؤسّسات الصغيرة ببلدك!

5) تعوّد تقول لأ
متل ما سبق وقلنا، من الطبيعيّ إنّو تكتر مطالب ولادك بهالفترة. بس ما فيك دايمًا تنفّذلن ياها! إذا طلبوا قرطاسيّة إضافيّة، فيك تطلب منّن يساعدوك بالأعمال المنزليّة ويشتغلوا مقابل اللي بدّن ياه. فسّرلن قبل ما تروحوا عالسوق عن اللائحة اللي حضّرناها وخلّي جوابك يكون لأ إذا عجبهم عدّة أغراض جديدة بالسوق. بتساعدك هالطريقة مش بس بتخفيف مصروفك بل كمان بتعليم ولادك قيمة المصاري. أمّا إذا كانوا ولادك بأوّل مشوارن الدراسي وبكّير عليهن استيعاب المفاهيم الماليّة، فيك تروح ببساطة عالسوق لوحدك!

بعد انتهاء الصيفية، أكيد الرجعة عالمدرسة صعبة عالتلاميذ. منتمنّى إنّو من خلال هالنصايح تبطّل صعبة عالأهل كمان! تابعونا بمقالات ماليّة واجتماعيّة جديدة... وبالتوفيق للجميع!