الحياة المعيشيّة بلبنان غالية خاصّة إنّو المدخول الشهري عند معظم اللبنانيّين محدود. العيشة بلبنان ما رح تغلا عليك إذا عملت بنصايحنا وحدّدت ميزانيّة لتتحكّم بمصاريفك ومش هيّ تتحكّم فيك. اقرأ المزيد

فيك تعيش بلبنان وما تنكسر

أكتريّة الناس بيتّكلوا على القروض ليسددوا أو يشتروا الإشياء يلّي بحاجة إلها ويكفّوا حياتن بشكل طبيعي. وكتير معقول تشوف شخص عم يطلب قرض للسيّارة وقرض للبيت بالوقت يلّي بعدو عم يسدّد قرض الجامعة.

بس كلّنا منعرف إنّو الحياة المعيشيّة بلبنان كتير غالية خاصّة إنّو المدخول الشهري عند معظم اللبنانيّين محدود وما بساعدن يخلصوا أمورن بنفسن؛ لهيدا السبب دايماً في قرض أو دين لازم يتسدّد وخوف ننكسر آخر الشهر.

المدفوعات والمصاريف ممكن تتراكم علينا بلا ما نكون عاملين حسابها. وللأسف كتار منّا ما بخصصوا ميزانيّة لتساعدن يتخطّوا العقبات الماديّة؛ وعلى الأرجح هيدي الطريقة هيّ أفضل وأهمّ وسيلة لإدارة مصاريفك. اجمع كلّ مدفوعاتك الثابتة كلّ شهر واخصمها من مدخولك الشهري وشوف إذا كان مدخولك بكفّي لتسدّد مصاريفك. هالطريقة بتساعدك تكتشف وين بتقدر تصرف أقلّ وتجمعّن بمجرّد ما تستلم المصاري وقبل ما يغريك صرفها.

كلما بتسدّد مستحقّاتك بكّير كلما كان أفضل لأنّ إذا تراكمت الديون لفترة أطول الفواتير بدورها رح تتكدّس أكتر. فإذاً، ما لازم تترك الديون توصل لمرحلة يصير من الصعب التحكّم فيها.

وبس بدّك تتسوّق من السوبرماركت، اشتري بالكميّات حتّى لو كنت عايش لوحدك وما عندك عيلة، لأنّ بالكميّة بتوفر مصاري كتير. وما تنسى في اغراض دايماً رح تكون بحاجة الها متل المحارم، معجنون الأسنان، القهوة، الشاي، السكّر ... وكتير غيرن.

بالنهاية، لو استمرّ الغلاء المعيشي بلبنان ما رح يغلا عليك إذا عملت بنصايحنا وحدّدت ميزانيّة لإنت تتحكّم بمصاريفك ومش هيّ تتحكّم فيك.